Кондак покаянного канона прп. Андрея Критского, глас 6:
Душе́ моя́, душе́ моя́,/ воста́ни, что спи́ши?/ коне́ц приближа́ется,/ и и́маши смути́тися:/ воспря́ни у́бо, да пощади́т тя Христо́с Бог,/ везде́ сый и вся исполня́яй.

Вмч. Феодора Стратилата. Тропарь мученика, глас 4.
Воинствосло́вием и́стинным, страстоте́рпче,/ Небе́снаго Царя́ воево́да предо́брый был еси́, Фео́доре,/ ору́жиями бо ве́ры ополчи́лся еси́ му́дренно,/ и победи́л еси́ де́монов полки́,/ и победоно́сный яви́лся еси́ страда́лец./ Те́мже тя ве́рою/ при́сно ублажа́ем.

Кондак, глас 2.
Му́жеством души́ в ве́ру оболки́йся/ и глаго́л Бо́жий, а́ки копие́, в ру́ку взем,/ врага́ победи́л еси́, му́чеников преве́лий Фео́доре,/ с ни́ми Христу́ Бо́гу моля́ся не преста́й о всех нас.

Свт. Саввы II, архиеп. Сербского. Тропарь, глас 4.
Исправле́ние ве́ры и о́браз кро́тости,/ и я́коже сад посреде́ рая́,/ преподо́бными де́лы твои́ми мир просвеща́еши,/ сего́ ра́ди к честне́й ра́це моще́й твои́х любо́вию прикаса́емся,/ лобыза́ем их и ве́рно вопие́м:/ предста́ни в по́мощь воспева́ющим па́мять святу́ю твою́ и светоно́сную,/ святи́телю о́тче Са́вво пребога́те, мо́лимся,/ Христу́ Бо́гу моли́ся/ спасти́ся душа́м на́шим.

Кондак, глас 8.
Я́ко архиере́ем сопресто́льник/ и святи́телем изря́дный побо́рник был еси́, святи́телю Са́вво,/ сохраня́яй оте́чество, оби́тель, град же и лю́ди, почита́ющия тя ве́рою/ и честны́м твои́м моще́м покланя́ющияся,/ да велегла́сно тебе́ вопие́м:/ ра́дуйся, Са́вво Богому́дре.