Свт. Иннокентия, еп. Иркутского. Тропарь, глас 3.
Свети́льниче Це́ркве пресве́тлый,/ озари́вый луча́ми добро́т твои́х страну́ сию́,/ и исцеле́ньми мно́гими притека́ющих к тебе́ с ве́рою/ Бо́га просла́вивый,/ мо́лим тя, святи́телю Инноке́нтие,/ огражда́й моли́твами твои́ми град сей/ от всех бед и печа́ли.

Кондак, глас 4.
Непоро́чности соиме́ннаго па́стыря,/ пропове́дника ве́ры в язы́цех Монго́льских,/ сла́ву и украше́ние Ирку́тския па́ствы/ любо́вию восхва́лим, вси ве́рнии:/ той бо есть храни́тель страны́ Сиби́рския/ и моли́твенник о душа́х на́ших.

Мч. Никифора, из Антиохии Сирской. Тропарь, глас 4.
Му́ченик Твой, Го́споди, Ники́фор,/ во страда́нии свое́м вене́ц прия́т нетле́нный от Тебе́, Бо́га на́шего,/ име́яй бо кре́пость Твою́,/ мучи́телей низложи́,/ сокруши́ и де́монов немощны́я де́рзости./ Того́ моли́твами/ спаси́ ду́ши на́ша.

Кондак, глас 1.
Любве́ сою́зом связа́вся, Ники́форе,/ разру́шил еси́ я́ве зло́бу нена́висти/ и мече́м во главу́ твою́ усе́чен был еси́,/ му́ченик Боже́ственный вопло́щшагося Спа́са,/ Его́же о нас моли́, пою́щих сла́вную па́мять твою́.

Кондак, глас 3.
Впери́вся, сла́вне, Госпо́днею любо́вию/ и Сего́ сла́вный Крест на ра́мо взем, посрами́л еси́ диа́воли ко́зни,/ пострада́л еси́ да́же до сме́рти/ и и́стины яви́лся еси́ победоно́сец,/ ору́жник и таи́нник Бо́жия благода́ти.

Прп. Панкратия Печерского, в Дальних пещерах. Тропарь, глас 2.
Панкра́тие Богому́дре,/ свяще́нниче Госпо́день изря́дне,/ и чуде́с мно́гих самоде́телю,/ моли́ся Го́сподеви,/ во е́же спасти́ ду́ши на́ша.

Кондак, глас 2.
В по́стницех яви́лся еси́ вели́к,/ во иере́ех же нарочи́т/ и в чудотворе́ниях да́ре показа́ся сла́вен,/ свяще́нне о́тче Панкра́тие,/ тем тя чтим и ублажа́ем.