Неделя о Страшном Суде. Кондак, глас 1.
Егда́ прии́деши, Бо́же, на зе́млю со сла́вою,/ и трепе́щут вся́ческая:/ река́ же о́гненная пред суди́щем влече́т,/ кни́ги разгиба́ются, и та́йная явля́ются:/ тогда́ изба́ви мя от огня́ неугаси́маго/ и сподо́би мя одесну́ю Тебе́ ста́ти, Судие́ пра́веднейший.

Тропарь воскресный, глас 6.
Áнгельския си́лы на гро́бе Твое́м/ и стрегу́щии омертве́ша,/ и стоя́ше Мари́я во гро́бе,/ и́щущи Пречи́стаго Те́ла Твоего́./ Плени́л еси́ ад, не искуси́вся от него́;/ сре́тил еси́ Де́ву, да́руяй живо́т./ Воскресы́й из ме́ртвых. Го́споди, сла́ва Тебе́.

Богородичен, глас тойже.
Благослове́нную нареки́й Твою́ Ма́терь,/ прише́л еси́ на стра́сть во́льным хоте́нием,/ возсия́в на Кресте́, взыска́ти хотя́ Ада́ма,/ глаго́ля Áнгелом:/ сра́дуйтеся Мне, я́ко обре́теся поги́бшая дра́хма./ Вся му́дре устро́ивый, Бо́же наш, сла́ва Тебе́.

Кондак, глас тойже.
Живонача́льною дла́нию/ уме́ршия от мра́чных удо́лий/ Жизнода́вец воскреси́в всех Христо́с Бог,/ воскресе́ние подаде́ челове́ческому ро́ду:/ есть бо всех Спаси́тель,/ Воскресе́ние и Живо́т, и Бог всех.

Обретение мощей мучеников, иже во Евгении. Тропарь, глас 4.
Му́ченицы Твои́, Го́споди,/ во страда́ниях свои́х венцы́ прия́ша нетле́нныя от Тебе́, Бо́га на́шего,/ иму́ще бо кре́пость Твою́,/ мучи́телей низложи́ша,/ сокруши́ша и де́монов немощны́я де́рзости./ Тех моли́твами/ спаси́ ду́ши на́ша.

Кондак, глас 4.
От земли́ возсия́вше я́ко свети́ла пра́вды,/ нече́стия всю отрази́сте мглу/ и ве́рных просвеща́ете,/ му́ченицы Боже́ственнии,/ Тро́ицы побо́рницы.

Кондак, глас 8.
Кре́пцыи ве́ры столпи́, добропобе́днии му́ченицы,/ за Христа́ подъе́мше разли́чныя му́ки,/ и на ле́та мно́га сокрове́ни бы́сте,/ и ны́не яви́стеся я́ко многоце́нное бога́тство,/ и в Це́рковь Бо́жию че́стно носи́ми архиере́я Бо́жия дла́ньми,/ прося́щим раздава́ете, е́же на по́льзу./ Тем моли́теся о душа́х на́ших.